نئی دہلی ،10؍ فروری (ایس او نیوز؍ایجنسی) مرکزی وزیر من سکھ منڈاویا نے بدھ کے روز کہا کہ چین میں پھنسے ہوئے 18 ہندوستانی ملاح 14 فروری کو ہندوستان واپس آئیں گے۔ یہ ٹیم بدھ کے روز جاپان سے روانہ ہوگی اور ہندوستان پہنچنے کے بعد اپنے اہل خانہ سے مل سکے گی۔

بندرگاہ ، جہاز رانی اور آبی گزرگاہوں کے وزیر من سکھ منڈاویا نے کہا کہ چین میں پھنسے ہوئے ایم وی اناستاسیا میں سوار ہمارے 18 ملاح ہندوستان آرہے ہیں۔ ٹیم آج جاپان سے روانہ ہوگی اور 14 فروری کو ہندوستان پہنچے گی۔وزیر نے کہا کہ وہ جلد ہی اپنے کنبہ کے ساتھ ملیں گے۔

من سکھ منڈاویا نے وطن واپسی کا انتظام کرنے پر چین میں ہندوستانی سفارتخانے اور بحیرہ روم کے جہاز کمپنی کی کاوشوں کی تعریف کی۔ ایک عہدیدار نے بتایا کہ کارگو جہاز ایم وی اناستاسیا ستمبر 2020 میں چین کے ساحل پرپھنس گیا تھا۔ اس سے قبل ایک اور کارگو جہاز ایم وی جگ آنند کے 23 ملاح بھی چین میں پھنس گئے تھے ، جو 14 جنوری کو ہندوستان پہنچے۔