نئی دہلی، 26؍فروری (ایس او نیوز؍ایجنسی) ہندوستان میں مہلک کورونا وائرس وبا کے معاملوں میں لگاتار گراوٹ درج کی جا رہی ہے۔ ملک میں گزشتہ 24 گھنٹوں میں کورونا وائرس کے 11 ہزار 499 نئے کیسز سامنے آئے ہیں اور 255 افراد کی موت واقع ہو گئی۔ 25 فروری کو 13 ہزار 166 معاملے درج کیے گئے تھے۔ یعنی کل کے مقابلے آج کورونا کیسز میں 12.6 فیصد کی گراوٹ ہوئی ہے۔

مرکزی وزارت صحت کی طرف سے جاری کیے گئے تازہ اعداد و شمار کے مطابق ملک میں اب سرگرم معاملوں کی تعداد گھٹ کر 1 لاکھ 21 ہزار 888 ہو گئی ہے۔ اس وبا سے ہلاک ہونے والوں کی مجموعی تعداد کی بات کی جائے تو، یہ بڑھ کر 5 لاکھ 13 ہزار 481 ہو گئی ہے۔ اعداد و شمار کے مطابق اب تک 4 کروڑ 22 لاکھ 70 ہزار 482 لوگ اس وبا سے شفایاب ہو چکے ہیں۔

دہلی میں کووڈ-19 سے ہلاک ہونے والے لوگوں میں اس سال 22 فروری تک لیے گئے نمونوں میں 80 فیصد اومیکرون ویریئنٹ پایا گیا ہے۔ سرکاری اعداد و شمار میں یہ جانکاری دی گئی ہے۔ مہلوکین سے لیے گئے 239 نمونوں کے جینوم سیکوئنسنگ سے پتہ چلا ہے کہ ان میں سے 191 میں کورونا وائرس کے اومیکرون ویریئنٹ تھے۔ بقیہ 48 یعنی 20 فیصد نمونوں میں ڈیلٹا سمیت کورونا وائرس کے دیگر ویریئنٹ پائے گئے۔