لکھنو،04؍جنوری (ایس او نیوز؍آئی این ایس انڈیا) دہلی اور میرٹھ کے درمیان تعمیر کیے جارہے ریپڈ ریل ٹرانزٹ سسٹم (آر آر ٹی ایس) کے ایک حصے کا معاہدہ ایک چینی کمپنی کو دیا گیا ہے۔ گذشتہ سال اس کمپنی کا معاہدہ بارڈر پر تناؤ کے درمیان معطل کردیا گیا تھا۔
نیشنل کیپٹل ریجن ٹرانسپورٹ کارپوریشن (این سی آر ٹی سی) نے صاحب آباد کے نیو اشوک نگر سے غازی آباد کے صاحب آباد تک شنگھائی ٹنل انجینئرنگ کمپنی لمیٹڈ تک 5.6 کلومیٹر طویل زیر زمین اسٹریچ کی تعمیر کا معاہدہ کیا ہے۔ این سی آر ٹی سی کے ذریعہ ملک کا پہلا علاقائی ریپڈ ریل ٹرانزٹ سسٹم (آر آر ٹی ایس) تیار کیا جارہا ہے۔ گزشتہ سال جون میں اس وقت بہت تنازعہ کھڑا ہوا تھا جب یہ اطلاع ملی تھی کہ چینی کمپنی نے ہند چین سرحدی تنازعہ کے درمیان سب سے کم رقم کی بولی لگائی ہے۔ اس تنازعہ کے پیش نظر چینی کمپنی کے معاہدے پر پابندی عائد کردی گئی تھی۔
رپورٹ کے مطابق این سی آر ٹی سی کا کہنا ہے کہ یہ معاہدہ مقررہ طریقہ کار اور ہدایات کے مطابق دیا گیا ہے۔ این سی آر ٹی سی کے ترجمان نے کہاکہ معاہدوں کی منظوری کئی سطحوں پر دی گئی ہے۔ اس کی مالی اعانت کئی ایجنسیاں کررہی ہیں۔ اب دہلی-غازی آباد-اب 82 کلومیٹر پر محیط دہلی۔ غازی آباد کاریڈورکے تمام سول ورک کو ٹھیکہ دے دیا گیا ہے۔ تعمیراتی کام جاری ہے ۔