نئی دہلی،30؍اکتوبر (آئی این ایس انڈیا) مرکزی حکومت نے سنٹرل وسٹا میں چلڈرن ریکریشنل پارک اور گرین ایریا کی زمین کے استعمال میں تبدیلی کے خلاف سپریم کورٹ میں دائر درخواست پر اپنا جواب داخل کیا ہے۔ اس کے بعد عدالت نے درخواست گزار راجیو سوری سے جوابی حلف نامہ داخل کرنے کو کہا ہے۔ اب کیس کی اگلی سماعت 16 نومبر کو ہوگی۔گزشتہ سماعت میں سپریم کورٹ نے اس عرضی پر مرکزی حکومت سے جواب طلب کیا تھا۔ درخواست گزار راجیو سوری نے سپریم کورٹ کو بتایا ہے کہ سینٹرل وسٹا کا پلاٹ نمبر 1 تفریحی سہولیات کے لیے استعمال کیا جانا تھا لیکن اسے رہائشی مقاصد کے لیے استعمال کیا جا رہا ہے۔

اس کے جواب میں سالیسٹر جنرل تشار مہتا نے مرکز کی جانب سے کہا تھا کہ وہ تین دن میں اپنا جواب داخل کریں گے اور حکومت سے ہدایات لیں گے۔ انہوں نے کہا کہ ان کا خیال ہے کہ پارلیمنٹ کی تعمیر، جس میں راشٹرپتی بھون اور نائب صدر ہاؤس بھی شامل ہے اس کا کام جاری ہے۔ ایسی صورت حال میں سیکورٹی زون میں تفریحی مقامات ممکن نہیں ہو سکتا۔درخواست میں الزام لگایا گیا ہے کہ زمین کے استعمال میں غیر قانونی تبدیلی کے نوٹیفکیشن سے دہلی کے باشندوں کو سماجی اور تفریحی سرگرمیوں کے لیے دستیاب سینٹرل وسٹا کے علاقے میں انتہائی قیمتی کھلے اور سبز مقامات سے محروم کر دیاگیا ہے۔

سینٹرل وسٹا پروجیکٹ سے موجودہ عمارتوں کو منہدم کرنے، ورثے کی عمارتوں کو تبدیل کرنے اور ان میں ترمیم کرنے، مشہور عمارتوں کو منہدم کرنے، 1960 کے دور کی ٹھوس عمارتوں کو تبدیل کرنے، ضلعی پارکوں اور بچوں کے تفریحی پارکوں کے طور پر کھلی جگہوں پر قبضہ کرنے کی کوشش کی گئی ہے جن کا تعلق ہندوستان کے تمام لوگوں سے ہے۔درخواست میں ایسے نوٹیفکیشن کو منسوخ کرنے کا مطالبہ کیا گیا ہے جو زمین کے استعمال میں تبدیلی کی اجازت دیتا ہے۔ درخواست گزار نے کہا کہ ہے کہ صحت مند زندگی اور ماحولیات کے نتیجے کی شکل میں دہلی کے رہائشیوں کے لیے تفریحی اورکھلے مقامات کا تحفظ کیا جانا چاہیے۔